السبت، 7 مايو 2016

كفتة بصوص الطحينة

الكفتة بصوص الطحينة .. مش عارف اذا كانت سورى ولا أردنى ولا فلسطينى ... بس اهى حاجة من الشام يعنى والبطن مبتفرقش الصراحة
بقلم الشيف سامح صدقي

 الكفتة بصوص الطحينة .. مش عارف اذا كانت سورى ولا أردنى ولا فلسطينى ... بس اهى حاجة من الشام يعنى والبطن مبتفرقش الصراحة

 المكونات:
1/2 كيلو لحمة مفرومة - بصلتين متوسطتين مفرومين ناعم - بطاطس حلقات بسمك 5 مم - كسبرة او بقدونس مفرومين - معلقتين كبار بقسماط - 5 فصوص توم مفرومين - معلقة ملح صغيرة - معلقة فلفل اسود صغيرة - نص معلقة صغيرة قرفة ،كسبرة ناشفة،جوزة الطيب،حبهان مطحون
مكونات الصوص: كوب طحينة - كوب زبادى - معلقتين عصير ليمون - معلقة صغيرة ملح - 2 كوب مياة
صنوبر محمص للتزيين "أنا استخدمت كاجو محمص"
 

 فى طاسة سخنة بننزل بالزيت وننزل البطاطس تاخد نص سوا ونروح نجهز الكفتة 

 بننزل بنص كمية البصل والتوم ونسيب الباقى للصوص 
ننزل بالبقدونس والبقسماط

 ننزل بالبهارات ونقلب ... ولو مش ماسكة او مش ناعمة نديها فرمة فى الكبة

 بالشكل دا .. ونجيب جنبنا حاجة فيها مية بارده ونكور الكفته

 بالشكل دا ... بطاطسنا بقت نص سوا ... نحطها فى بايركس وفى نفس الزيت ننزل نشوح الكفتة دى برده 5 دقايق على كل وش 

 وننزلها فى صينيه وندخلها فرن متوسط عشان تستوى ونروح نعمل الصوص

 ننزل بالطحينة والزبادى والليمون والملح والتوم .. لسة فاضل بصل هانعرف وظيفته فى الصورة الجاية 

 وننزل بالمية ونقلب وفى نفس الزيت بتاع الكفتة ننزل بشوية زيت كمان وندبل البصل ولو ظهر حاجات متحروقة نشيلها بمنديل عشان متغمقش الصوص


 أول ما البصل يدبل ننزل بالصوص ونديله تقليبة ونطلع الصينية من الفرنقبل ما تستوى ننزل بالصوص ونرجعها تانى تكمل سواها ويبقى الوقت الاجمالى للتسوية في الفرن نص ساعة

 نطلعها من الفرن ونزينها بصنوبر او كاجو متحمص وشوية كسبرة مفرومة .. ونقدمها مع عيش او رز او مكرونة زى ما نحب

وبالهنا والشفتشي


شكرا للشيف الرائع سامح صدقي على تعاونه معنا

ليست هناك تعليقات:

إرسال تعليق