السبت، 7 مايو، 2016

الشاورما بطعم المطاعم من مطبخ الشيف الرائع سامح صدقي

أصدقاء كتير جدا طلبوا منى الشاورما من زمان .. بس انا مقدرش أنزل حاجة وتجربوها متعجبكوش .. الشاورما بطعم المطاعم زى كل اللى كلها ما قال عنها .. يارب بجد تعجبكم ..اعملوها للاولاد وهما بيذكروا ... يارب يوفقهم .. صباح الهنا عليكم
بقلم الشيف سامح صدقي


المكونات :1/2 ك صدور فراخ - 2 م كبيرة زبادى - معلقة كبيرة صلصة - معلقتين كبار عصار ليمون - معلقة صغيرة ملح - بهارات شاورما ودى انا عملتها فى البيت معلقة صغيرة من (فلفل اسود - بابريكا) ونص معلقة صغيرة من (جنزبيل - بصل بودرة - توم بودرة - فلفل ابيض) ربع معلقة صغيرة (حبهان مطحون - قرفة مطحونة - قرنفل مطحون) ودى كمية تليق للنص كيلو لو هانعمل كيلو نضاعف 

مكونات العيش: 3 كوب دقيق ويفضل بلدى مش ابيض - 2 معلقة صغيرة خميرة - معلقة صغيرة سكر - معلقة صغيرة ملح - كوب ونص ماء فاتر
اول حاجة نجيب الصدر قدامنا وهانلاقى فيه حتة طالعة لواحدها دى اسمها الفيليه وبنفصلها الأول .. بعد كدا نفتح الصدر بالنص
فى بولة بننزل بالبهارات والملح ونقلبهم كويس عشان تتوزع كويس فى التتبيلة وبعد كدا الزبادى والصلصة وعصير الليمون
نقلب الخليط كويس وننزل بالفراخ نتبلها ونغطيها ببلاستيك فيلم بس نلزقه فى الفراخ نطلع كل الهوا زى منا ضاغط بايدى كدا ... وندخلها التلاجة ساعتين بالظبط هاتكون اتبلت وعلى ما تتبل نكون عملنا العيش

هناخد نص كوب مياة من اللى كان معانا نحط فيه الخميرة والسكر ونغطيهم عشان تتفاعل وتبقى نشطة ... نخلى بالنا لو المية باردة مش هاتصحى من النوم ولو المية سخنة هاتموت ... لازم تكون فاترة زى دمعة العين
التعليقات
ننزل بالملح عالدقيق ونقلب .. واول مالخميرة تتفاعل ننزل بيها على الدقيق وباقى المية الا شوية ونزودهم لو احتاجت ونقلب بمعلقة

ننزل على الرخامة بالخليط كله ونبدأ نعجن لحد العجين ما يلم معانا

نفضل نعجن كويس فى العجينة عشان كل ما نعجن أكتر كل ما العيش يطلع معانا اطرى ونغلف العجينة بزيت ونحطها فى بولة ونغطيها كويس اما بفوطة او بلاستيك فيلم ونسيبها تخمر ساعة

بعد ما تخمر نطلعها نقسمها كور والمقدار دا تقريبا يعمل 6 وحدات - نرش دقيق ونفردها على قد ما نقدر بالنشابة ... واحنا شغالين فى العيش نغطى باقى الكمية دايما عشان متنشفش

بعد كدا عشان تبقى رقيقة اوى نعمل ايدينا قبضة بالشكل دا ونفضل نلف العجينة على القبضة دى فهتبقى أرق 
زى ماحنا عارفين ان التنور بتاع العيش مش عندنا كمصريين فشوفت فكرة اننا نقلب حاجة زى الطاسة دى ونسخنها ونفرد عليها العجين لحد ما يستوى من جنب واحد ونشيل الرغيف ونحطه فى فوطة عشان يفضل طرى

نطلع الفراخ المتبلة بتاعتنا من التلاجة ونرصها فى الصينية بالشكل دا وندخلها فى فرن عالى .. ونتابعها لحد ما تستوى .. هى خدت معايا نص ساعة بالظبط عالوشين ... ونطلعها نقطعها شرايح بالورب بالشكل دا عشان النسيج ميزعلناش فى الأكل

العيش جهز .. الفراخ اتقطعت .. عملنا شوية تومية زى اللى عملناهم فى الفراخ المشوية وقولنا بالظبط : 6 معالق كبيرة مايونيز - معلقتين زبادى - ربع معلقة ملح - 6 فصوص كبار توم - معلقة كبيرة خل ونضربهم فى الخلاط وهما بيتضربوا ننزل عليهم بسرسوب زيت قيمة ربع كوب .. هاتتقل معانا وتعمل لنفسها شخصية نسيبها تربط فى التلاجة بتبقى عظيمة جدا 

نجيب العيش ... نفرد عليه شوية تومية ... والفراخ والخيار المخلل ونلفه ...


ندهنة زبدة او زيت زيتون ونحطه فى التوستر أو عالجريل نقرمشه ونعلمه .. ونقدمه بالشكل دا مع كاتشب او مسترده وممكن دبس رمان .... اتفضلوا بقى 


شكرا للشيف الرائع سامح صدقي علي تعاونه معنا 

ليست هناك تعليقات:

إرسال تعليق