السبت، 7 مايو، 2016

التندورى الهندى





المكونات :-

فراخ - ٢ كوب زبادى - جنزبيل اخضر - ٥ فصوص توم كبير - معلقتين كبار بهار التندورى ودا بلاقيه عند اى عطار كبير - عصير ليمونتين - معلقة كبيرة بهار الجرامسالا ودا لقيته فى كارفور - معلقة كبيرة بودرة جنزبيل - معلقة صغيرة بابريكا - معلقة صغيرة قرفة - معلقة صغيرة شطة - نص معلقة صغيرة لون طعام احمر



 الخطوات :-


بنجيب الورك ونفتح فيه فتحات بالطول توصل للعضم .. بفضل فى الوصفة دى اننا نستخدم وراك بس او صدور بس لان وقت التسوية بتختلف


بنقشر الجنزبيل



ونقطع التوم


نحطهم مع بعض فى الكبة ومعاهم معلقة زيت ونفرهم


وننزلهم فى بولة بالشكل دا



كدا بقى معانا معجون الجنزبيل والتوم اللي هو اساس من اساسيات المطبخ الهندى ... Ginger garlic paste



فى بولة ننزل بالزبادى وهنا صفيته فى مصفاه لمدة ٤ ساعات عشان ينزل كل ميته


عصير الليمون



معجون التوم والجنزبيل


بهارات التندورى .... على فكرة ممكن نعمله فى البيت بس نخلى دا الهوم ورك بتاعنا ... ندخل على جوجل ونشوف بيتعمل ازاى ... يلا فرحونى


بهار الجرامسالا ودا برده هوم ورك


البهارات الباقية



معلقة كبيرة ملح


نقلب


ننزل بالفراخ


ونقلب بجوانتى عشان اللون لحد التتبيلة ما تدخل كل حتة


ونغطيها ببلاستيك ونسيبها فى التلاجةعلى الاقل ٤-٦ ساعات


التندورى بيتسوى فى فرن اسمه تندور لكن دا مش عندنا فبنسويها على شبكة الفرن بالشكل دا ونشغل الفرن بس لمدة من ساعة لساعة ونص على درجة حرارة متوسطة على حسب حجم الفراخ ونحط تحت الشبكة صينية او رف الفرن عشان الدهون تنزل فيها


ونقدمها مع سلطة خضرا وعيش وليمون والبصل اساسي مع التندورى ... و #بالهنا_والشفتشى
للشيف الرائع سامح صدقى

ليست هناك تعليقات:

إرسال تعليق